လပွတ္တာမြို့နယ်မှ ရန်ကုန်ဈေးကွက်သို့ ဖေဖော်ဝါရီလအတွင်း နေလှန်းဆားပိဿာချိန် ၇၅,၀၀၀ တင်ပို့
02 Mar
ဧရာဝတီတိုင်းဒေသကြီး၊ လပွတ္တာမြို့နယ်မှ ရန်ကုန်ဈေးကွက်သို့ ဖေဖော်ဝါရီလအတွင်း ဒေသထွက်နေလှန်း ဆားပိဿာချိန် ၇၅,၀၀၀ တင်ပို့ရောင်းချနိုင်ခဲ့ကြောင်း လပွတ္တာမြို့နယ် နေလှန်းဆားထုတ်လုပ်ရောင်းဝယ်ရေး ပွဲရုံ များမှသိရပါတယ်။ လပွတ္တာမြို့နယ်မှ ရန်ကုန်ဈေးကွက်သို့ ပြီးခဲ့တဲ့ဇန်နဝါရီလအတွင်း ဒေသထွက်နေလှန်းဆားပိဿာချိန် ၄၅,၀၀၀ ထိသာ တင်ပို့ရောင်းချနိုင်ခဲ့ပြီး ဖေဖော်ဝါရီ ၁ ရက်မှ ၂၈ ရက်ထိ တစ်လအတွင်း နေလှန်းဆားပိဿာချိန် ၇၅,၀၀၀ ထိ တင်ပို့ရောင်းချနိုင်ခဲ့တာဖြစ်ပါတယ်။ နေလှန်းဆားများကို ရန်ကုန်ဈေးကွက်ကိုသာ တင်ပို့ရောင်းချမှုများရှိနေပြီး အခုလို ဆားအရောင်းအဝယ် ကောင်းလာလို့ ဆားထုတ်လုပ်တဲ့လုပ်ငန်းနဲ့ ဆက်စပ်နေတဲ့ သူများအနေနဲ့ အလုပ်အကိုင် အခွင့်အလမ်းကောင်းများ ရရှိနေကြောင်း သိရပါတယ်။ လက်ရှိတွင် နေလှန်းဆားပိဿာ ၁၀၀ လျှင် ငွေကျပ် ၆၀၀၀၀ ထိရရှိနေပြီး ဒေသထွက် နေလှန်းဆားများကို ငါးပိ၊ ငါးခြောက်နဲ့ ငန်ပြာရည် လုပ်ငန်းများမှာလည်း အဓိကအသုံးပြုလျက်ရှိပါတယ်။ (NVS 004)
