ယူကရိန်းနိုင်ငံအတွင်းသို့ လက်နက်များ စီးဆင်းဝင်ရောက်မှုကို ယာယီ သို့မဟုတ် လုံးဝရပ်တန့်နိုင်မည့်နည်းလမ်း ရှိ/မရှိ ရှာဖွေကြရန် အမေရိကန်သမ္မတ ဒေါ်နယ်ထရမ့် က အမေရိကန်အရာရှိများအား ညွှန်ကြားလိုက်ကြောင်း The Wall Street Journal က ဖော်ပြခဲ့သည်။ ဝါရှင်တန်မြို့ရှိ အိမ်ဖြူတော်တွင် ထရမ့် နှင့် ယူကရိန်းသမ္မတ ဇီလန်စကီး တို့ကြား အငြင်းအခုံဖြစ်ပွားပြီးနောက် ထရမ့် က ယူကရိန်းနိုင်ငံသို့ လက်ရှိဝင်ရောက်နေသည့် လက်နက်များအားလုံး ရပ်တန့်နိုင်မည့်အလားအလာကို စဉ်းစားလာခြင်းဖြစ်ကြောင်း Washington Post သတင်းစာက သမ္မတအကြံပေးတစ်ဦး၏ ပြောဆိုချက်ကိုကိုးကား၍ အစောပိုင်းတွင် ဖော်ပြထားခဲ့သည်။ ထို့ပြင် ထရမ့် သည် လက်ရှိတွင် ယူကရိန်းနှင့်စပ်လျဉ်း၍ နောက်ထပ်လုပ်ဆောင်ချက်များ ထပ်မံလုပ်ဆောင်ရန် စောင့်ဆိုင်းလျက်ရှိကြောင်း သတင်းစာတွင် ဆက်လက်ဖော်ပြထားသည်။ ထရမ့်နှင့် ဇီလန်စကီး တို့သည် အိမ်ဖြူတော်၌ ပြီးခဲ့တဲ့ ရက်သတ္တပတ်အကုန်ပိုင်းက တွေ့ဆုံဆွေးနွေးခဲ့ပြီးနောက် မကြာမီ ၎င်းဆွေးနွေးမှုသည် အငြင်းအခုံအဖြစ်သို့ ပြောင်းလဲသွားခြင်းဖြစ်ကြောင်း သိရသည်။ ငြင်းခုံမှုအတွင်း ဇီလန်စကီး က ထရမ့် အား ရိုသေမှုမရှိဘဲ ရိုင်းပျစွာဆက်ဆံခဲ့ သည်ဟု ထရမ့် က ယူဆထားသည်။ ၎င်းတို့နှစ်ဦးကြား ငြင်းခုံမှုဖြစ်ပွားခြင်းကြောင့် အမေရိကန်နှင့် ယူကရိန်းတို့အနေဖြင့် ၎င်းတို့ကြားလက်မှတ်ရေးထိုးမည့် မြေရှားသဘောတူညီချက်ကိုလည်း ရပ်ဆိုင်းပစ်ခဲ့ကြောင်း သိရသည်။ ထို့ပြင် ဇီလန်စကီး သည် လက်ရှိ ရုရှားနှင့်ဖြစ်ပွားနေသည့် ယူကရိန်းပဋိပက္ခကို ငြိမ်းချမ်းစွာဖြေရှင်းရန် ဆန္ဒရှိသည့် အရိပ်အယောင်မရှိဟု ထရမ့် က ထပ်လောင်း ပြောကြားထားသည်။