အီရန်နျူကလီးယားအစီအစဉ်နှင့်ပတ်သက်၍ စေ့စပ်ညှိနှိုင်းမှုများပြုလုပ်ရန် လမ်းဖွင့်ပေးထားသော်လည်း အနိုင်ကျင့်ဗိုလ်ကျစိုးမိုး ခြယ်လှယ်မှုများကို လက်ခံသွားမည်မဟုတ်ကြောင်း အီရန်သမ္မတ မာဆွတ်ပီဇက်ရှ်ကီယန် က ဖေဖော်ဝါရီလ ၂၇ ရက်တွင် ပြောကြားခဲ့သည်။ အီရန်အပေါ် အမေရိကန်၏ ပိတ်ဆို့အရေးမှုများနှင့် အမြင့်ဆုံးဖိအားပေးရန် လှုံ့ဆော်မှုကိုရည်ညွှန်းကာ သမ္မတ မာဆွတ်ပီဇက်ရှ်ကီယန် က တီဟီရန်ပြည်နယ်ရှိ ပြည်နယ်အစိုးရအဖွဲ့များမှ ညွှန်ကြားရေးမှူးများနှင့်တွေ့ဆုံစဉ် ထိုသို့ ပြောကြားခဲ့ခြင်းဖြစ်သည်။ အီရန်အပေါ် ပိတ်ဆို့အရေးယူမှုများနှင့် ဖိအားပေးမှုများကို ကြောက်ရွံ့နေမည်မဟုတ်ဘဲ အနိုင်ကျင့်ဗိုလ်ကျ စိုးမိုးခြယ်လှယ်မှုများကိုမူ လက်မြှောက်အလျှော့ပေးသွားမည်မဟုတ်ကြောင်း၊ ထို့အပြင် ပိတ်ဆို့အရေးယူမှုများကို ပြင်းပြင်းထန်ထန်လုပ်ဆောင်ပြီးမှ စေ့စပ်ဆွေးနွေးညှိနှိုင်းရန်ဖိတ်ခေါ်သည့် ပုံစံကိုလည်း လက်ခံမည်မဟုတ်ကြောင်း သမ္မတ ပီဇက်ရှ်ကီယန် က ဆိုသည်။ အီရန်နိုင်ငံ၏ နျူလက်နက်ပိုင်ဆိုင်မှုကို ဟန့်တားရန်ရည်ရွယ်၍ ယခုလအစောပိုင်းတွင် အမေရိကန်သမ္မတ ဒေါ်နယ်ထရမ့် က အီရန်နိုင်ငံအပေါ် အမြင့်ဆုံးဖိအားပေး ပိတ်ဆို့အရေးယူရေး လှုပ်ရှားမှုကို ပြန်လည်လုပ်ဆောင်ခဲ့သည်။ အမေရိကန်က အီရန်နိုင်ငံ၏ ရေနံစိမ်းတင်ပို့မှုနှင့်ဆက်စပ်သည့် လူပုဂ္ဂိုလ်များ၊ အဖွဲ့အစည်းများနှင့် လုပ်ငန်းရှင်များ အပေါ် အရေးယူပိတ်ဆို့မှု နှစ်ကြိမ်ပြုလုပ်ထားသည်။