ဂရင်းစလမ်ချန်ပီယံဆုကို ၂ ကြိမ်ရရှိထားတဲ့ ကမ္ဘာ့အဆင့်(၁)ဟောင်း ရိုမေးနီးယားတင်းနစ်မယ် ဆီမိုနာ ဟာလပ် ဟာ ကစားသမားဘဝကနေ အနားယူလိုက်ပြီလို့ ဖေဖော်ဝါရီ ၄ ရက်မှာ အတည်ပြုခဲ့ပါတယ်။ ထရန်ဇယ် ဗေးနီးယားအိုးပင်းတင်းနစ်ပြိုင်ပွဲ ပထမအဆင့်မှာ ရှုံးနိမ့်ခဲ့ပြီးနောက် ဟာလပ် က သူမရဲ့ ဆုံးဖြတ်ချက်ကို ကြေညာ သွားခဲ့တာဖြစ်ပါတယ်။ ပြီးခဲ့တဲ့လက ဩစတြေးလျအိုးပင်းလက်ရည်စစ်ပွဲမှာ ဒူးဒဏ်ရာရခဲ့ပြီးနောက် ကစားသမား ဘဝကနေ အနားယူဖို့ စဉ်းစားနေတယ်လို့ ဟာလပ် က ပြောကြားခဲ့တာ ဖြစ်ပါတယ်။ အခုယှဉ်ပြိုင်ခဲ့တဲ့ ထရန်ဇယ် ဗေးနီးယား အိုးပင်းပြိုင်ပွဲက တားမြစ်ဆေးပြဿနာကြောင့် ၂ နှစ်နီးပါး ပွဲပယ်ခံရပြီးနောက်ပိုင်း ဟာလပ် ပြန်ကစားတဲ့ ၅ ခု မြောက် WTA Tour ပွဲစဉ်လည်း ဖြစ်ပါတယ်။ အဆိုပါပွဲအပြီး ပရိသတ်ကိုပြောကြားရာမှာ အခုဆုံးဖြတ်ချက်အတွက် ခက်ခက်ခဲခဲ ဆုံးဖြတ်ခဲ့ရတာဖြစ်သလို ကမ္ဘာ့ အဆင့်(၁) နေရာအထိ ရောက်ခဲ့တဲ့ဖြစ်ရပ်အပါအဝင် တင်းနစ်ပြိုင်ပွဲနဲ့အတူ အမှတ်ရစရာတွေ အများကြီးရရှိခဲ့ပါ တယ်လို့ ဟာလပ် က ထည့်သွင်းပြောကြားသွားခဲ့ပါတယ်။ အသက် ၃၃ နှစ်အရွယ် ဟာလပ် ဟာ ၂၀၁၈ ခုနှစ်မှာ ကစားသမားဘဝ ပထမဆုံးဂရင်းစလမ် ချန်ပီယံဆုအဖြစ် ပြင်သစ်အိုးပင်းချန်ပီယံဆုကိုရရှိခဲ့ပြီး ၂၀၁၉ ခုနှစ်မှာ ဝင်ဘယ်ဒန်ချန်ပီယံဆုကို ဆက်လက်ရယူနိုင်ခဲ့တာ ဖြစ်ပါတယ်။ WTA တိုးချန်ပီယံဆုကို ၂၂ ကြိမ်ရယူနိုင်ခဲ့တဲ့ ဟာလပ်ဟာ ကမ္ဘာ့အဆင့်(၁) နေရာမှာ ၆၄ ပတ်ကြာ ရပ်တည်နိုင်ခဲ့သူ ဖြစ်ပါတယ်။ (NVS 004)