“ရာနှုန်းပြည့်နိုင်ပွဲနဲ့အတူ နောက်တစ်ဆင့်တက်ရောက်သွားတဲ့ လီဗာပူးလ်အသင်း”
23 Jan
လီဗာပူးလ်ကတော့ အိမ်ကွင်း အန်ဖီးလ်မှာ လိုင်လီကို ၂ ဂိုး ၁ ဂိုးနဲ့အနိုင်ယူပြီး စနစ်သစ်ချန်ပီယံလိဂ်ပြိုင်ပွဲရဲ့ ၁၆ သင်းအဆင့်ကို ရာနှုန်းပြည့်နိုင်ပွဲနဲ့အတူ တက်ရောက်သွားခဲ့ပြီဖြစ်ပါတယ်။ ပွဲစဉ်နောက်ထပ်တစ်ပွဲသာ ကစားဖို့ ကျန်ရှိနေသေးပေမယ့် လီဗာပူးလ်အသင်းဟာ ၇ ပွဲကစားပြီးချိန်မှာ ၇ ပွဲ လုံးအနိုင်ရရှိပြီး ရမှတ် ၂၁ မှတ်နဲ့ ဇယားထိပ်ဆုံးမှာ ရပ်တည်နိုင်ခဲ့တာ ဖြစ်ပါတယ်။ လီဗာပူးလ်အသင်းဟာ ၇ ပွဲမှာ သွင်းဂိုး ၁၅ ဂိုးအထိသွင်းယူနိုင်ခဲ့ပြီး ပေးဂိုးက ၂ ဂိုးတည်းသာ ရှိခဲ့ပါတယ်။ စနစ်သစ်ချန်ပီယံလိဂ်ပြိုင်ပွဲမှာ ထိပ်ဆုံး ၈ သင်းက ၁၆ သင်းအဆင့်ကို တိုက်ရိုက်တက်ရောက်ခွင့်ရမှာဖြစ်ပြီး အဆင့် ၉ ကနေ ၂၄ အထိ အသင်းတွေက play off ကစားပြီးမှ နောက်တစ်ဆင့်တက်ရမှာဖြစ်ပါတယ်။ ဒါကြောင့် လီဗာပူးလ်အသင်းက ရာနှုန်းပြည့်နိုင်ပွဲတွေနဲ့ အမှတ်ပေးဇယားထိပ်ဆုံးမှာ ရပ်တည်နိုင်ခဲ့ပြီး ၁၆ သင်းအဆင့် ကို တိုက်ရိုက်တက်ရောက်နိုင်ခဲ့တာ ဖြစ်ပါတယ်။ ပရီးမီးယားလိဂ်ရဲ့ အသင်းတစ်သင်းဖြစ်တဲ့ မန်စီးတီးအသင်းကတော့ ချန်ပီယံလိဂ်ပြိုင်ပွဲကနေအစောဆုံး ထွက်ခွာ ရဖွယ် ရှိနေပါတယ်။ (NVS 008)
