“တောင်ကိုရီးယားသမ္မတ ယွန်ဆက်ယို လာမည့်ဖေဖော်ဝါရီလတွင် ရာထူးမှနုတ်ထွက်ရနိုင်”
11 Dec
စစ်အုပ်ချုပ်ရေး ဥပဒေပြဋ္ဌာန်းရန်ကြိုးပမ်းမှု ပျက်ပြားခဲ့ပြီးနောက် တောင်ကိုရီးယားသမ္မတ ယွန်ဆက်ယို အနေဖြင့် လာမည့်နှစ် ဖေဖော်ဝါရီလတွင် ရာထူးမှနုတ်ထွက်ရနိုင်ကြောင်း ဒီဇင်ဘာလ ၁၀ ရက်တွင် သတင်းများ၌ ရေးသားဖော်ပြထားသည်။ သမ္မတ ယွန်ဆက်ယိုသည် လာမည့်နှစ် ဖေဖော်ဝါရီလတွင် ရာထူးမှနုတ်ထွက်ရေး အတွက် စတင်ဆွေးနွေးနေကြောင်း လက်ရှိ အာဏာရပြည်သူ့အာဏာပါတီက ဒီဇင်ဘာလ ၁၀ ရက်တွင် သတင်း ထုတ်ပြန်ထားသည်။ တောင်ကိုရီးယား သမ္မတ ယွန်ဆက်ယိုသည် အတိုက်အခံပါတီများကို ထိုးနှက်မှုတစ်ရပ်အနေ ဖြင့် ဒီဇင်ဘာလ ၃ ရက်တွင် စစ်အုပ်ချုပ်ရေးဥပဒေကို ပြဋ္ဌာန်းရန်ကြိုးပမ်းခဲ့ပြီး တောင်ကိုရီးယားနိုင်ငံ၏ နိုင်ငံရေး အကျပ်အတည်းတစ်ရပ်ကို ထွက်ပေါ်စေခဲ့ခြင်း ဖြစ်သည်။ သမ္မတ ယွန်ဆက်ယိုသည် လွှတ်တော်အမတ်များနှင့် ပြည်သူများ၏ဆန့်ကျင်မှုကြောင့် စစ်အုပ်ချုပ်ရေး ဥပဒေကြေညာချက်ကို ထုတ်ပြန်ပြီး နာရီအနည်းငယ်အကြာတွင် ပြန်လည်ရုပ်သိမ်းခဲ့ရသည်။ ထို့အပြင် သမ္မတ ရာထူးမှ နုတ်ထွက်ပေးရန် ဖိအားပေးမှုများကိုလည်း သမ္မတယွန်ဆက်ယိုအနေဖြင့် ရင်ဆိုင်နေခဲ့ရသည်။ လက်ရှိ အချိန်တွင် သမ္မတယွန်ဆက်ယိုမှာ ရာဇဝတ်ကြောင်းအရ စုံစမ်းစစ်ဆေးမှုများနှင့်ရင်ဆိုင်နေရပြီး ပြည်ပခရီး ထွက်ခွာခွင့်လည်း ပိတ်ပင်ခံထားရကြောင်း RT သတင်းဌာနတွင် ဖော်ပြထားသည်။
